Тывада уругларның уран чүүл школаларының башкылары август хуралынга кадрлар айтырыын чугаалажыр

25.08.2022 Август 26-27 хүннеринде эртер август конференциязынга республиканың культура болгаш уран чүүл өөредилге албан черлериниң ажылдакчылары чыглып, ужуражыр. Профессионал ниитилежилге төлээлериниң ужуражылгазын ТР-ниң культура болгаш уран чүүл яамызы-биле “Курлавыр төвү” ТР НПӨ КБА-ны эрттирер. Конференцияның кол темазы – кадрлар хандырылгазының айтырыынче угланган.

Конференцияның ажылынга республиканың культура болгаш туризм сайыды Виктор Чигжит, «Курлавыр төвүнүң» директору Чечек Ширижик, музыковед, уран чурулга өөредилгезиниң адырныда эксперт, педагогика эртемнериниң кандидады, АртРесурс.РФ порталдың кол редактору, РФ-тиң Культура яамызының уругларның уран чүүл школаларының ажыл-чорудалгазын хөгжүдер айтырыглар талазы-биле ажылчын бөлүктүң кежигүнү Ирина Домогацкая киржир.

Августтуң 27-де Ирина Домогацкая республиканың уран чүүл школаларының удуртукчуларынга «Уругларның уран чүүл школаларының ажыл-чорудулгазында нормативтиг-хоойлу үндезини: 2022-2023 өөредилге чылында чаңгыс база чогаадыкчы шиитпирлер» деп семинарны эрттирер.