Тываның Кадык камгалал яамызы Call-төптерниң ажылын күштелдирген

24.08.2022 Кадык камгалал яамызының бо август 24-түң хүнүнде сан-чурагайы-биле алырга, ковидтээн 234 кижини чаңгыс дүүн хүнде илереткен. Ол аараан кижилерниң 49-зу бичии уруглар болза (20,9 хуузу), 185-и – улуг кижилер (79,1 хуузу).
Чыдып эмнээр эмнелгелерде 203 кижи чыдар. 12 кижиниң байдалы берге. 2 кижини ИВЛ аппаратта кошкан. Республиканың эмнелге албан черлеринде шупту 1947 кижи ук халдавырдан эмнедип турар.
Хүн бүрүде аарыг кижилерниң саны немежип, грипптеп турарларның саны көвүдээнинден, республиканың консультативтиг-диагностика төвү аарыгны тодарадып аңгылаар 110 дугаар өрээлдиң ажылдаар шактарын узаткан.
Дружба кудумчузунда республиканың консультативтиг-диагностика төвүнүң 110 дугаарлыг өрээли ук төпте быжыглаттынган, аараан кижилерни дыштаныр хүннер чокка, 8 шактан 20.00 шакка хүлээп алыр. Эмчи ажылдакчылары ээлчежип ажылдаар: бирги бригада эртенгиниң 8.00 шактан 14.00 шакка, а өскези 14.00 шактан 20.00 шакка чедир.
Консультативтиг-диагностика төвүнде Call-төптүң 3-73-73 дугаарлыг телефону эртенгиниң 8 шактан кежээкиниң 22.00 шакка чедир дыңнадыгларны хүлээр. Эртенгиниң 08.00 шактан 15.00 шакка чедир дөрт, 15.00 шактан 22.00 шакка чедир үш оператор ажылдап турар.
Соңгаарладып болбас дуза өрээли дыштаныр хүн чокка, хүннүң-не 8.00 шактан 22.00 шакка чедир кыйгыртылгаларже үнер, 12.00-13.00 шак аразында дүштеки чапсарлаар.
Оон аңгыда төпке келгеш, 408 дугаар кабинетке тарыдып ап болурун чурттакчы чонга дыңнадып тур. Тарыдылга өрээли 08.00 шактан 18.00 шакка чедир ажылдаар, дүштеки чапсары - 12.00-13.00 шакта.