Шагаан-Арыгда “Хову дайынчызы” скульптураны долгандыр Азия төвүнүң көшкүн чонунуң парыгын тудар

23.08.2022 Келир чылын Шагаан-Арыг хоорайга чаа шөл – Азия төвүнүң көшкүн чонунуң парыгы туттунар. 2022 чылдың август 18-19 хүннеринде Тамбов хоорайга эрткен “Чуртталга хүрээлели: бодунуң бажыңы” бүгү-российжи шуулган үезинде, биче хоорайларда база төөгүлүг суурларда таарымчалыг хоорай хүрээлелин тургузар талазы-биле эки дирткен төлевилелдер мөөрейинге бо парктың төлевилели тиилээн. Шагаан-арыгжылар боттарының чогаадыкчы бодалын боттандырар кылдыр 70 млн рубльдиң күрүне деткимчезин алырлар.
Төлевилелде айыттынганы езугаар, Шагаан-Арыгда Бай-Даг дагның эдээнде бо чылын туттунган “Хову дайынчызы” скульптурлуг композицияны долгандыр паркты чаагайжыды тудар. Паркче чырыкты шөйүп, оруктарын шывар, массалыг хемчеглер эрттирер черни, өг зоназын, бадылажылга езулалының шөлү база немежир. Оон аңгыда амфитеатрны, уруглар ойнаар база спортчу шөлдер база ону каастаар.
Улуг-Хем кожууннуң кол архитектору Карина Комбуй төлевилелди чогааткан, «Авангард» КХН-ниң архитектору Алдынай Байкара дөзевилелин шыйып чураан. Тыва Республиканың тудуг яамызы конкурска киржир чагыгны киирген.
2022 чылдың төнчүзүнге чедир объектиниң төлевилел-смета документациязын кылып, тудугжулар-биле керээни чарар.
Эрткен чылын Нижний Новгородка эрткен шак-ла ындыг мөөрейге Тываның төлевилели база тиилээнин сагындыраал. “Чурттаар чер болгаш хоорай хүрээлели” национал төлевилелдиң күрүне субсидиязының акшазы-биле бирги көжүп келген орус чонга паркты Туран хоорайда тудуп турар.