«Тываның командазы-2030» шуулган киржикчилериниң төлевилелдери «Тыва Республиканың социал идеялар банкызынче» кирер

«Тываның командазы-2030» республика лидерлерниң шуулганынга киржир чагыглар хүлээп алыышкыны доозулган. Хемчегниң кол организатору ТР-ниң Аныяктар херээниң талазы-биле агентилелдиң дыңнатканы-биле алырга, эксперт комиссиязының сайгарылгазынче чүс хире анкета кирген.

Шуулган 14-35 харлыг аныяктарны чылдың-на хаара тудуп турарын сагындараал. Бо чылын шуулганга киржир дизе, «Россияның аныяктары» автоматчыткан информастыг системага бүрүткеткеш, система ажыглакчызының хуу кабинединде анкетаны долдурар ужурлуг. Анкетага профессионал болгаш хууда эки талаларын, мергежилинге чедиишкинин, шуулганга чүү дээш киржип турарының дугайында солун чогаадыг-эссени бижиир апаар. Оон аңгыда, шуулган үезинде кандыг айтырыгны шиитпирлексеп, чүнү сүмелексеп турарынга беленин өскелер-биле үлежир.

Эксперт комиссиязы эң солун ажылдарны шилип, оларның авторлары-биле «Алдын-Булак» этнокультурлуг комплекске август 25-те ужуражып, дөрт хүн иштинде кады ажылдаарлар.

Бо шуулганда солун өөредилге программаларындан аңгыда, чедиишикнниг сайгарлыкчылар, эксперттер, хөй-ниити ажылдакчылары, эрге-чагрыгның база бизнестиң төлээлери-биле онлайн ужуражылгаларны эрттирип, социал болгаш бизнес төлевилелдерни камгалаары планнаттынган.

Шуулган үезинде төлевилелдер конвейерин тургузуп, «Тыва Республиканың социал идеялар банкызынче» каттыштырар.