Ростуризмниң 2023 чылда туризм адырында төлевилелдерге грант деткимчезин көргүзери-биле шилиттинген 44 регионнуң санында Тыва база кирген

23.08.2022 Ростуризм регионнар аразынга конкурс шилилдезин дооскан. Туризм адырында аңгы-аңгы угланыышкыннарлыг шупту 1 муң хире төлевилелди 2023 чылда деткиир сорулгалыг шупту 5, 3 млрд рубльди тускайлаан. Чурттуң 82 регионундан 231 чагыг кирген деп, ведомствонуң удуртукчузу Зарина Догузова дыңнаткан.
Национал турисчи маршруттарны ажыдып база хөгжүдүп, далай, хемнер база хөлдер эриинде эштир зоналарны кылып, хөгжүдер дээн төлевилелдерлиг 44 регионга 3,1 млрд рубль акшаны хуваар. Ында 375 төлевилел бар. 44 регионнуң санында Тыва Республиканың шилиттингени регионга турисчи кокпаларны улам калбартырынга улуг идигни бээри чугаажок.
Ростуризмче кирген 10 регионнуң чагыгларында кемпингилер болгаш автокемпингилер ажыдар 150 төлевилел бар. Олар шупту 700 млн рубль түңнүг грант акшазын үлежир.
21 регионнуң турисчи дериг-херекселдер садар, электроннуг орук айтыкчылары тургузар, кадыкшыл байдалы кызыгаарлыг кижилерге турисчи хүрээлелди хөгжүдер, инфотөптерге база прокат пунктуларынга дериг-херекселдер садар, чаа турисчи оруктарны ажылдап кылыр база дыштанылга зоналарын дерип, организастаар дээн төлевилелдери ниитизи-биле 1,55 млрд рубльди алырлар.
Шилиттинген регионнарга грант деткимчезин бээр төлевилелдер шилилдезиниң конкурузу 2023 чылда болуп эртерин сагындыраал.