Амыдыралдың берге байдалынга таварышкан өг-бүлелерниң ажы-төлүнге дузалажыры-биле «Школаже чыгдынарынга дузалаш!» акция эгелээн

«Школаже чыгдынарынга дузалаш!» деп бо ачы-буян акциязын хөй ажы-төлдүг болгаш амыдыралы берге байдалдыг өг-бүлелерниң ажы-төлүнге школаже белеткениринге дузалажыр сорулгалыг эрттирери чаңчыл апарган. Тыва Республиканың Өөредилге яамызының августуң 10-дан эгелеп чарлааны акция сентябрь 20-ге чедир уламчылаарын дыңнадып турар.

Республиканың чурттакчылыг суурларының, хоорайларының идепкейлиг хамаатылары, хуу сайгарлыкчылары база албан-организациялары ук хемчегге чылдың-на киржип, амыдыралы берге болгаш хөй ажы-төлдүг өг-бүлелерниң школа назылыг бир муң хире ажы-төлүнге дузаны чедирип турар.

Ачы-дуза акциязынга киржир күзелдиглерни дараазында адресте хүлээп турар: Кызыл хоорай, Московская кудумчузу, бажың 44, 13 дугаар кабинет, телефон +7(39422)21548, ГБОУДО РТ «РЦРДО» баазазында.

Ол ышкаш республиканың кожууннарында муниципалдыг тургузугларның өөредилге эргелелдеринде ажыттынган пунктуларда буянныг чурттакчыларның дузаламчызын хүлээп турар.