Тываның найысылалынга Россия Федерациязының Күрүне тугунуң хүнүнде байырлыг езулалды эрттирген

22.08.2022 Бөгүн Россия Федерациязының Күрүне тугунуң хүнүн демдеглеп турар. Республиканың найысылалы Кызыл хоорайда Арат шөлүнге аңаа тураскаадып, Россия Федерациязы биле Тыва Республиканың күрүне туктарын көдүрер байырлыг езулал болуп эрткен.
Күрүне туктарын көдүрер езулалга Тыва Республиканың Чазааның кежигүннери, ТР-ниң Дээди Хуралының (парламент) депутаттары, республиканың шериг кезектериниң база корум-чурум тудар органнарының төлээлери киришкен. Тыва Республиканың шериг комиссарының хүлээлгезин күүседип турар Басенков байырлыг чыскаалга беленин илеткээн. РФ-тиң база ТР-ниң ыдык ырыларның үделгези-биле Россияның база Тываның туктарын киискиткен.
Тыва Республиканың Баштыңы Владислав Ховалыг Россияның күрүне тугунуң хүнү-биле, социал четкилер таварыштыр чаңгыс чер-чурттугларынга байырны чедирген.
“Хүндүлүг чаңгыс чер-чурттуглар!
Россияның Күрүне тугунуң хүнү-биле силерге байыр чедирип тур мен! Бо онзагай хүнде, бистиң күрүнениң кол ыдык демдектериниң бирээзинге ханы хүндүткелди илередип тур бис. Бистиң тугувус – байлак төөгүлүг болгаш салгал дамчаан езу-чаңчылдарлыг, чоннуң чаңгыс демин болгаш сагыш-сеткил-биле бир доңун көргүскен күчү-күштүг чуртувустуң демдээ болур.
Россияда аңгы-аңгы язы-сөөктүг болгаш шажын чүдүлгелерлиг миллион-миллион кижилер чурттап база ажылдап чоруур. Оларны Төрээн чуртка ынакшылы, ону оон-даа күштүг болгаш чечектелген кылыр изиг күзели каттыштырып турар.
Улуг чуртувустуң хамаатыларынга, шупту чонга быжыг кадыкшылды, чаагай чорукту болгаш бүзүрелди, күчүлүг Россиявыстың келир үези дээш чаа-чаа чедиишкиннерни күзедим!” – деп, В. Ховалыг бижээн.