“Азияның уруглары” делегейниң спортчу оюннарынга Тывадан аныяк мөгелер ээлчеглиг медальдарын чаалап алган

05.08.2022 Бо хонуктарда якуттарның хапсагай хүрежинге салыглар доозулган. Сүт-Хөл, Улуг-Хем, Кызыл кожууннарның база Кызыл хоорайның спорт школаларының сургуулдары алды аңгы бөлүкке хүрешкеш, Россияның чыынджы командазынга 5 медальды чалап эккелген - 1 алдын, 2 мөңгүн база 2 хүлер.
70 кил мөгелер аразынга Айрат Ооржак кымга-даа аштырбайн, чемпионнаан. Ол сумога база тыва хүрештерге республика чемпиону, а делегей чергелиг оюннарга бирги алдын медалы бооп турар.
Дайза Ондар база Буян Монгуш боттарының деңзилери – 62 база 70 килдерге ийилээ ийиги черни ээлеп, мөңгүн медальдарны чаалап алган. Олар шыырак дээн якут мөгелерге душканнар.
Спорттуң бо хевиринге Буян-Бадыргы Ондар (50 кг) биле Чимит Соян (55 кг) үшкү черлерни ээлээн.
Тываның Баштыңы Владислав Ховалыг бодунуң блогунда, делегей маргылдаазынга Россияны болгаш Тываны төлептии-биле төлээлээн бичии мөгелерге ам-даа спортчу чедиишкиннерни күзеп, байырын чедирган.
Июльдуң 27-ден август 8-ке чедир, Владивосток хоорайда элээди спортчулар аразында делегейниң спортчу маргылдаалары эртип турарын сагындыраал. Ында 12 чурттардан 13-тен 16 харлыг элээди спортчулар аразында спортчу маргылдаалар болуп турар.
Бистиң бичии мөгелевривис Эртине Иргит биле Булат Ооржак спортчу хүреште мөңгүн медальдарны чаалап алганын сагындыраал.