Бо чылын Тывага болган арга өрттериниң чамдыызы чаңныктан өөскээн

03.08.2022 Регионнуң диспетчер албанының дыңнатканы болза, август 3-те Тываның арга-арыг фондузунуң черлеринде 75,9 га ниити шөлдүг дөрт өрт бүрүткеттинген. 7,5 га черде өрт өжүрттүнген болза, артканнары ам-даа хыппышаан.

Каа-Хем (Сизим база Бүрен-Бай-Хаак) база Кызылдың (Черби участогу) арга-арыг ажыл-агый девискээринде үш өрт бар. Өөскээн өрттерниң кол чылдагааны чаңнык дүшкенинден болган деп, республиканың Арга-арыг болгаш бойдус ажыглалының яамызы тодараткан.

2022 чылда өрт айыылының сезону эгелээнинден Тываның арга-арыг фондузунуң черлеринге 9176,55 га ниити шөлдүг 104 арга-арыг өрттери бүрүткеттинген.
Республиканың онза хайгааралдыг черлери – “Азас” заповеднигинге үш, “Убсу-Нур ыйгылаажынга” бир өрттер болган.

Бо чылын арга-арыгда өрттер-биле байдал нарын дээрзин яамы демдеглээн. Эрткен чылдың бо үезинге деңнээрге, 74 өрт хөй. Азы 8 муң гадан хөй шөлде арга-арыг өрттен когараан. Өрттерниң хып үнген чылдагааны - чаңнык дүшкенинден. Араг-арыгга болган тос өрт өске ажыглалда черлерден дамчып келген. А арткан өрттер кижиниң буруузундан өөскээн.

Өрт айыылының сезону эгелээнден 83 административтиг херектерни оттурган, ооң 74-үнге 284 муң рубль түңнүг торгаалды онааган.