Эртине биле Булат “Азияның уруглары” делегей оюннарынга мөңгүн медальдарны чаалап алганнар

03.08.2022 “Азияның уруглары” делегейниң спортчу оюннары дөрт чылда бир катап эрттип турар. Ону Саха (Якут) республиканың бирги президентизи Михаил Николаевтиң саналдааны езугаар, 1996 чылда Олимпийжи шимчээшкинниң 100 чылдаанынга тураскаадып бир-ле дугаар эрттирген.
“Азияның уруглары” спортчу оюннар уруглар болгаш элээдилерниң ортузунга олимпийжи шимчээшкинни нептередиринге, амыдыралдың кадык овур-хевирин суртаалдап, уруглар спортун хөгжүдеринге, Азия-Оожум океан регион чурттарының уруглар база аныяктар аразынга эп-найыралды быжыглаарынга улуг рольду ойнап турар.
Сөөлгү 25 чыл иштинде спортчу оюннарга Азияның 30 хире чурттарындан муң хире аныяк спортчулар киржип, Олимпийжи оюннарже, делегейниң база диптиң чемпионаттарынче база бирги чери дээш маргылдааларынче улуг орукту ажыткан.
“Азияның уруглары” оюннар 2019 чылгф чедир чүгле чайгы үеде эртип турган болза, Мурнуу-Сахалинге болган оюннар соонда, ону ам чайгы болгаш кышкы хевирлерге ийи аңгы эрттирип турар апарган.
Бо чылын делегейниң 12 чурттарындан 1500 элээдилер спорттуң 19 аңгы хевиринге 273 комплект медальдар дээш мөөрейлежип турар. Тыва Республикадан спортчулар Сибирь федералдыг округ дээш спортчу хүрешке база якут хапсагайга хүрежирлер.
Дүүн “Азияның уруглары” VII делегейниң спортчу оюннары эртип турар Владивосток хоорайдан өөрүнчүг медээ келген. Бистиң мөге оолдарывыс - Эртине Иргит биле Булат Ооржак спортчу хүрешке Россияны төлээлээн. Оларның аадаңында россия чергелиг медальдар немешкен. Эртине биле Булат – делегей оюннарының мөңгүн медальдарын тиилеп алганнар. Ынчангаш мөгелеривиске ам-даа бедик спортчу чедиишкиннерни күзеп каалыңар.