Тываның Баштыңы 55-ки аңгы мото-адыгжы бригаданың шериг албанныгларынга күрүне шаңналдарын тывыскан

Бөгүн Тываның Баштыңы Владислав Ховалыг Төп шериг округунуң 41-ги ниити шериг армиязының 55-ки аңгы мото-адыгжы бригадазының командиринге республиканың дээди күрүне шаңналы - Буян-Бадыргы орденниң III чергезин база аңгы шериг салбырының командиринге “Тиилелге хүнү” тураскаалдыг медальды тывыскан.

Республика Баштыңының чарлыында, ДУР база ЛУР-нуң девискээринде тускай шериг операция үезинде, шериг хүлээлгезин күүседип тура, маадырлыг, эрес-дидим база сыныш чок чоруу дээш шаңналдарны тыпсып турарын айыткан.  

Шаңнал алганнарның аразында Сирияга дайынчы хүлээлгезин күүседип чораан арга-дуржулгалыг офицер, тускай шериг операциязының бирги хүнүнден эгелеп ында киришкен шериг албанныглар бар.

“Дайынчы хөделиишкиннерге чаңгыс чер-чурттугларывыстың быжыг тура-соруун каңнап, солдаттарының дугайында сагыш човап, шериг уран аргаларның эге билиглерин билдилиг өөредирде, командир кижиниң ролю дыка улуг. 55-ки мото-адыгжы бригаданың дайынчыларының дугайында дыңнап турарывыс мактал сөстер Тываның чурттакчыларынга улуг чоргааралды болдурган» - деп, регионнуң удуртукчузу демдеглээн.

Владислав Ховалыг чаңгыс чер-чурттуг шериглерниң дайынчы хей-аъды болгаш, даалгаларын төлептиг күүседип чорууру дээш, сеткилиниң ханызындан четтиргенин илереткен.