Тываның Баштыңы Самагалтайда школа септелгезин барып хынаан

01.08.2022
"Чаңгыс демниг Россия" партияның деткимчези-биле боттаныышкында федералдыг программаны күүседип, Тывада чайгы үеде 27 көдээ школада септелгелер чоруп турар. Оларның элээн кажы - чедери берге ыраккы кожууннарда. Тываның Баштыңы Владислав Ховалыг Самагалтай суурда школа септелгезин боду көрүп четкен.

Республика Баштыңы ажылдар шалыпкын болгаш шынарлыг чоруп турарын бодунуң блогунда бижээш, тудугнуң удуртукчузу Орлан Аракчаага база ооң бригадазының ажылдакчыларынга четтиргениниң сөстерин дамчыткан.
"Самагалтайның 2 дугаар ортумак школазының өөреникчилери база башкылары чаа өөредилге чылын бүрүнү-биле чаартынган оран-савага эгелээр болганынга өөрүп тур мен" – деп, Владислав Ховалыг бижээн.

Школаның дээвиирин, шалазын, суг болгаш чылыг хандырылгазын долузу-биле солаан. Ам иштики шеверлел ажылдары дооступ, линолеумну чадып турар. Бригадирниң чугаазы-биле алырга, август 5-те шупту ажылдарны доозуптарлар.
Республика Баштыңы чүгле школаның чаартылгазынче эвес, а ооң девискээринче база кичээнгейни углаарын сагындырган. Модернизация программазында ол ажылдар кирбээн-даа болза, аңаа хол хереги көскү. Ынчангаш Владислав Ховалыг келир чылдың бюджедин хевирлеп тура , школа чанының девискээрлерин септеп база чаагайжыдарынче акша-хөреңгини аңгылаарын өөредилге сайыды Алексей Храмцовка база тудуг сайыды Аяс Хунай-оолга сүмелээн.

Тываның кожууннарда 5 муң ажыг школачылар бо өөредилге чылын чаартынган оран-саваларга эгелээр.