Тыва Республикада Россияның СПФАЭ ажылдакчылары Украинада российжи шериглерге ачы-буян дузазын чыгган

27.07.2022 Суд приставтарының ажылдакчылары тускай шериг операциязы эгелээнден бээр ведомстводан ачы-буян дузазының чыылдазын организастаан. Чыгдынган акша-хөреңги-биле ДУР биле ЛУР-дан көжүп келгеннерге бирги хереглелдиң херекселдерин, чылыг чоорганнарны, орун-дөжек херекселдерин, уругларга херек чүүлдерни база номнарны саткаш, чоруткан. Ооң мурнунда суд приставтарының шупту составы 55-ки мото-адыгжы, даг бригадазының чепсектиг күштеринге дузаламчы кылдыр ужудукчу чок ужар аппараттарны база рация комплектилерин дамчыткан турган.

«Бистиң шериглерни бүгү-ле аргалар-биле деткиир ужурлуг бис. Дайынчыларывыстың амы-тынын камгалаарынга бо техника дыка ажыктыг дээрзинге бүзүрээр бис» – деп, Тываның кол суд приставы Омак Достай чугаалаан.

Россияның суд приставтары федералдыг албанның Тыва Республикада эргелелиниң ажылдакчы бүрүзү ачы-буян акциязынга киржип, Донецк база Луганск республикалардан көжүп келгеннерге дуза кылдыр бир хүннүң ажыл төлевирин шилчидип, ниитизи-биле 600 муң рубльди чыып берген.

Тываның корум-чурум камгалаар органнарның ажылдакчылары, суд приставтарының төлээлери Россия Федерациязының Чепсектиг Күштериниң шериг албанныгларының дайынчы хей-аъдын көдүрүп, деткиири-биле #МыВместе ачы-дуза чедирилгезиниң бүгү-российжи акциязын организастап, #ЖИВУ!СПАСИБО! бүгү-российжи флешбомга киришкен.