Тывада сайыттар болгаш муниципалиттер даргалары өнчү-хөреңги үндүрүүнүң чыылдазының талазы-биле неделя санында илеткээр

26.07.2022 Июньнуң 1-ден июль 15-ке чедир Тывада кижилерден өнчү-хөреңги үндүрүглериниң чыырының шалыпчы айы чоруп турар. Ооң түңнелинде, өнчү-хөреңгиге өрениң түңү 5 хуу кызырлып, 191,2 млн рубль турганындан 181,7 млн рубль чедир эвээжээн.
Бо шалыпчы айда 15 млн рубль чыыр дээн план 63 хуу күүсеттинип, 9,5 млн рубль чыгдынган. Тываның Баштыңы өнчү-хөреңгиге үндүрүглер төлевилерин база өрелерин ведомствога хамааржыр албан черлериниң ажылдакчыларының төлеп турарын хууда контрольдаар даалганы яамылар, ведомстволар болгаш муниципалдыг районнар удуртукчуларынга дааскан.
Россияның федералдыг үндүрүг албанының Тыва Республикада эргелелиниң дыңнатканы-биле алырга, үндүрүглер чыырының шалыпчы айында өрелер чыырынга Чеди-Хөл (1,5 млн. рубль өрениң 13,2%, азы 0,2 млн. рублин чыгган), Өвүр (1,9 млн. рубльдиң 11,2%, азы 0,2 млн. рублин) база Таңды (4,1 млн. рубльдиң 10,4%, азы 0,4 млн. рублин) кожууннар тергиидээн.
Ооң-биле чергелештир үндүрүглер чыылдазында хожудайгай кожууннар база бар: Тожу (1,4 млн. рубльдиң 1,72%, азы 0,025 млн. рубли), Кызыл (22,8 млн. рубльдиң 4,4%, азы 0,1 млн. рубли) база Кызыл хоорай (113,8 млн. рубльдиң 4,2%, азы 0,5 млн. рубли чыгдынган).
Владислав Ховалыг амгы үндүрүглер төлевирлерин төлээрин база үндүрүгде өрелерин дуглаарының чугулазының дугайында ажылдакчылар ортузунга тайылбыр ажылын чорударын эң хөй ведомство албан черлерлиг социал адырның сайыттарынга дааскан.
Удуртукчулар үндүрүг өрелерин эвээжедир дээш кандыг хемчеглер алганын неделя санында илеткээр.