Тываның Баштыңының культура болгаш уран чүүл адырында грантызын үлээн

26.07.2022 Чогаадыкчы төлевилелдерни боттандырарынга Тыва Республиканың Баштыңы - Чазааның Даргазының культура болгаш уран чүүл адырында грант алырынче чагыгларга конкурс шилилдезиниң түңнелдерин үндүрген.
2022 чылдың июль 21-де, Тываның культура болгаш уран чүүл сайыды Виктор Чигжиттиң даргалаашкыны-биле конкурс комиссиязы хуралдаан. Культура болгаш уран чүүл адырында хуу сайгарлыкчылардан, боттарын ажыл-биле хандыртынган хамаатылардан конкурсче 31 чагыг кирген. Шупту чагыгларны үнелеп сайгарган соонда, тиилекчилерни илереткен.
Кагай-оол Аяс Витальевичиниң чурттакчы чоннуң номчуттунарын нептередир сорулгалыг “Номга тураскаал” деп арт-объект тудар дээн төлевилели хөй үннү алгаш, шылгараан. Ук төлевилелдиң боттаныышкынынче грант кылдыр 300 муң рубльди бээр. Ол акша-хөреңги-биле скульптура тудар материалдар садар.
А Хомушку Олег Картыг-ооловичиниң «Тыва хомус» деп каасталга мастерскаязын тудар дээн төлевилели 200 муң рубльдиң грантызынга төлептиг болган. Ол акша-хөреңгини мастерскаяны дерип, чепсеглээринче үндүрер.
Комиссия чагыглар санының хөйүн өөренип көргеш, 2023 чылда ниити бюджеттен бээр грантының түңүн болгаш хемчээлин улгаттырарын саналдап киирген.