Тываның Баштыңы Кадык камгалал яамызынга Covid-19-тан камгалал тарыышкыннарны дүргедедир даалганы берген

26.07.2022 Эпидемиологтарның даап санааны-биле алырга, шөлээде дыштанган кижилер күзүн кээп эгелээрге, чаа коронавирус халдавыры база грипп аарыы көвүдей берип болур. Сөөлгү чеди хонукта Тывада аараан кижилер саны немежип турары демдеглеттинген. Ооң мурнунда неделяга деңнээрге, июльдуң 18-тен 24-ке чедир ийи катап хөй, азы лабораторияга бадыткаттынган аарыг сес кижи илереттинген.
Тываның Баштыңы Владислав Ховалыг Кадык камгалал яамызынга чурттакчы чонну коронавирус халдавырындан тарыыр ажылды күштелдирип, коллектив кежигүннери тарылганы үе шаанда алыр кылдыр кады ажылдаар даалганы күүсекчи база муниципалдыг эрге-чагырга органнарының удуртукчуларынга берген.
Кызыл хоорайда, Чөөн-Хемчик база Бии-Хем кожууннарда аарыг кижилер илереттинген. Арткан муниципалдыг тургузугларда ындыг таварылгалар бүрүткеттинмээн.
Республиканың кол санитар эмчизи Людмила Салчак сөөлгү аараан кижилерниң дөртү тарытпаанын, а бир кижиниң катап тарыдар үези эрте бергенин дыңнаткан. Республикада чурттакчы чонну халдавырдан камгалап тарыыр болгаш катап тарыыр ажылдар кошкак чоруп турарын ол факт бадыткаан. Россия Федерациязының Чазааның Дүүштүрүлге төвүнүң медээлер самбыразында сан-чурагайлардан алырга, республикада коллективтиг иммунитеттиң деңнели 15,9 %.
Аарыгның хенертен көдүрлүрүн болдурбас дизе, грипп база коронавирустан тарыдып алырының эң эптиг үези бо деп, Владислав Ховалыг чугаалаан. Ынчангаш күүсекчи эрге-чагырга органнарының удуртукчулары, кожуун чагырга даргалары чону долу тарыышкынны алган турарын чедип алыр дээш, харыысалгалыын сагындырган. Ылаңгыя улуг назылыг, хоочу аарыгларлыг, иштиг херээжен чонче онза кичээнгейни углаар.
Эң эвээш кижилер тарыткан Ак-Довурак хоорай биле Барыын-Хемчик кожуун чагырга даргалары ол ажылды боттарының контролюнга алырын негээн.
COVID-19-тан 6 ай бурунгаар тарыткан 100 749 кижи 2022 чылдың июль 24-ке чедир катап тарыдар ужурлуг.