Кызылдан дөрт доозукчу орус дылга чаңгыс аай күрүне шылгалдаларын 100 санныг демдекке кылган

16.06.2022 Май 30-де доозукчуларның бижээни орус дылга чаңгыс ай күрүне шылгалдаларының түңнелдерин чарлаан. Тываның найысылалында ниити өөредилге албан черлериниң дөрт өөреникчизи 100 санныг демдекти алган. Аттестатты алырынга ол эртемге 24-тен эвээш эвес санны алыр ужурлуг. А чурттуң дээди өөредилге черлери дужаап кирериниң эң эвээш саны 36 кылдыр доктааткан.

Дөрт кижи – Кызылдың 15 дугаар лицейиниң өөреникчизи Старикова Анастасия Андреевна, Тываның республиканың лицей-интернадының 11 классчызы Хомушку Монгун-Очур Алдын-оолович база Кызылдың президентиниң кадет училищезиниң доозукчулары Маннык Булат Воеволодович биле Хертек Дан-Хаяа Алдын-Буяновна орус дылга чаңгыс аай күрүне шылгалдазынга эң бедик - 100 баллды алганнар.

Регионнуң школаларындан 11 класстың ийи муң хире доозукчузу орус дылга шылгалданы дужааган. 2080 өөреникчиниң 2017-зи орус дылга түңнел шылгалданы чаңгыс аай күрүне шылгалдазы кылдыр, а 63 доозукчу күрүнениң доозукчу шылгалдазы кылдыр дужааган.
Түңнел шылгалдаже 13 уруг келбээн. Олар база ийи демдек алганнар, июнь 23-тен июль 2-ге чедир, курлавыр хүннерде шылгалданы дужаап алыр эргелиг.
15 дугаар лицейниң, республиканың лицей-интернадының база Кызылдың президентиниң кадет училищезиниң кижизидикчилери күрүне шылгалдаларын 100 баллга бир дугаар эвес дужаап турарын демдеглезе чогуур. Эрткен чылын ол-ла өөредилге черлериниң доозукчулары литературага эң бедик демдектерни алганнар.