Тывада турисчи кешбэк программазы-биле уруглар лагерьлеринче муң хире путевканы садып алган

16.06.2022 Республиканың чурттакчылары мирпутешествий.рф платформа таварыштыр уругларның кадыкшылга лагерьлеринче 993 билетти садып алган. Регионнуң чурагай яамызының Күрүне ачы-дузалары чаңгыс аай порталында “Чурагайлыг күрүне башкарылгазы” регион төлевилелиниң “Уруглар дыштанылгазын база оларның кадыкшылгазын организастаарда турисчи ачы-дуза төлевири-биле холбашкан хамаатыларның чарыгдалдарының кезек чамдыызын эгидер хары угда бээр төлевир” ачы-дузаны кииргениниң ачызында, Тываның чурттакчылары путевка өртээниниң чартыын эгидип алыр аргалыг апарган.

Ростуризмниң уруглар лагерьлеринче путевкалар өртээн субсидиялаар программазында Тываның хоорайдан дашкаар 15 лагери кирген.
«Чодураа», «Орленок», «Чагытай», «Ак-Хол», «Металлург», «Шуралгак», «Сайлык», «Родничок», «Отчугаш», «Бельбей», «Шолбан-Ак», «Азас», «Юность», «Шивилиг» база «Таежный» лагерьлер боттарының баазаларынче дыштанылга билеттерин мирпутешествий.рф программа таварыштыр тарадып саткан.

Тываның хоорайдан дашкаар лагерьлеринче путувкаларның өртээн 14385 рубль кылдыр доктааткан, бир уругга бир хүнде 685 рубль болур. Турисчи кешбэк программазының киржикчилери ол түңнүң чартыын эгидип алганнар. Программаның негелдези езугаар, путевканы саткан соонда беш ажыл хүнүнүң дургузунда акшаны эгидер.

Россия Федерациязының Президентизи Владимир Путинниң 2021 чылда Федералдыг Хуралга Айыткалын күүседип, уругларның кадыкшылга лагерьлеринче турисчи кэшбек-биле саткан путевка өртээниң 50 хуузун ажы-төлдүг өг-бүлелерге күрүне деткимчези кылдыр эгидери көрдүнген.