Кызылга ча адарынга Россия чемпионадының шилилде маргылдаалары болуп эртер

15.06.2022 2022 чылдың июнь 16-19 хүннеринде, В.С. Биче-оол аттыг стадионга, эр болгаш херээжен спортчулар аразынга ча адарының маргылдаазы болуп эртер.

Чемпионаттың организатору - Тыва Республиканың ча адарының федерациязы киржикчилерниң спортчу арга-мергежилин бедидер база Россия чемпионадынче чыынды команданы хевирлээринге шыырак спортчуларны илередир сорулга-биле маргылдааны эрттирер.

Тыва Республиканың күш-культуразының база спортунуң тергиини, ССРЭ-ниң спорт мастери Игорь Чамзо маргылдааның судья коллегиязын удуртур, а алдарлыг спорт мастери Елена Достай кол секретарьлаар.

Маргылдаага киржир чагыгны 2022 чылдың июнь 15-ке чедир маргылдааның кол секретарынче чорудар, а Россияның Ча адар федерацияның тургускан майыында ат-сывын бижээн бадыткалдыг чагыгны маргылдаа эгелээрге чедир бир шак бурунгаар киирер.
Росспорттуң 2006 чылдың август 21-де № 547 дужаалы езугаар, маргылдааның шупту киржикчилери камгаладылгалыг болур.