Тываның кожууннарын «Эки муниципалдыг практика» бүгү-российжи конкурска киржиринче чалаан

14.06.2022 Тываның экономиктиг хөгжүлде яамызы «Эки муниципалдыг практика» бүгү-российжи мөөрейниң регион чадазынга киржир чагыгларны июль 1-ге чедир хүлээп алыр. Регион чадазының тиилекчилери регионну федералдыг чадада төлээлээр, финалдың киржикчилеринге дипломнарны болгаш 10-дан 50 млн рубль чедир акша шаңналдарын тыпсыр.
Конкурс чагыгларын дараазында угланыышкыннарже хүлээп турар:
- «Хоорай тудуунуң политиказы, чурттакчы чоннуң амыдырал-чуртталга хүлээлелин хандырары база чуртталга-коммунал ажыл-агыйын хөгжүдери»;
- «Муниципалдыг экономика политиказы база муниципалдыг саң-хөө башкарылгазы»;
- «Муниципалдыг тургузуглар чурттакчылары-биле шынарлыг “дорт харылзааны” хандырары, территориалдыг хөй-ниити бот-башкарылгазын хөгжүдери база тус чер бот-башкарылгазынче өске-даа аргалар-биле хамаатыларны хаара тудары (киириштирери)»;
- «Националдар аразында тайбыңны база эп-найыралды быжыглаары, национал политика адырында өске-даа хемчеглерни муниципалдыг деңнелге боттандырары»;
- «Чурагайлыг технологияларны база платформа шиитпирлерин («угаанныг хоорай») ажыглап, хоорай ажыл-агыйын эде чаартыры».
Бөгүнде чүгле чаңгыс муниципалдыг тургузуг – Бай-Тайга кожуун чагыргазы «Националдар аразында тайбыңны база эп-найыралды быжыглаары, национал политика адырында өске-даа хемчеглерни муниципалдыг деңнелге ботандырары » деп угланыышкында чагыгны кииргенин регионнуң Экономиктиг хөгжүлде яамызы дыңнаткан.
Тус чер бот-башкарылгазының төлевилелдерин деткээн конкурска кожуун чагыргалары идепкейин көргүзүп, документилерин дужаарын ведомство кыйгырган.
Конкурска киржир дугайында айтырыглар тыпты берзе, 8(39422)2-26-73 телефонче; азы terrazvit17@mail.ru деп адрестиг электроннуг почтаже чорудар.