Тывага хамнаашкынның «Дунгур» бирги российжи фестивалы болуп эртер

03.06.2022 Фестивальдың киржикчилери болгаш аалчылары тыва культураның чарылбас кезээ - хамнаашкын таварыштыр республика-биле чоок таныжар аргалыг. Июньнуң 20-22 хүннеринде «Дунгур» фестивалы «Алдын-Булак» этнокультура комплекизинче Россияның аңгы-аңгы булуңнарындан хамнарны хаара тудар.

Аалчылар үш хонук дургузунда Тываның культуразын, национал аъш-чемин, улусчу ус-шеверлелин сонуургап, хамнар-биле чоок таныжып, хамнаашкынның улуг езулалдарга киржирин хемчегниң эрттирикчизи Тываның националдар херектериниң талазы-биле агентилел дыңнаткан.

Республиканың үндезин чурттакчылары ук фестивальга киржип, боттарының онзагай амыдырал-чуртталгазын база культуразын көргүзер.
Бо хемчег шыжын чүдүлгени шинчилеп, өөренип чоруур кижилерге солун болуру чугаажок.

Фестивальдың эрттирикчилери хемчегни чылдың-на эрттирип, регионче аян-чорукчуларның санын көвүдедип, болуушкунну туризмниң бир онзагай талазы болдурарын чедип алыр бодалдыг.

Фестивальдың дугайында тодаргай медээни Тыва Республиканың националдар херектериниң талазы-биле агентилелдиң 8 (39422) 3-21-81 дугаарлыг телефонундан база https://vk.com/tyvashamany деп шөлүгден билип ап болур.