Тываның кызыгаарында Моолдан чума кирген таварылганы чок кылырынга өөредилгени эрттирген

03.06.2022 Росхереглел хайгааралының ТР-де эргелели, ТР-ниң Кадык камгалал яамызы, Тываның чумага удур станциязы, Россияның ФАА ТР-де Кызыгаар эргелели, Каайлы албаны, ТР-де ИХЯ ажылдакчыларының киржилгези-биле, кожа күрүнеден чума кирген таварылганы узуткап чок кылырынга чурттар аразының өөредиглиг белеткели үш дугаар болуп эрткен. Бо удаада кожа Моолдан төлээлерни база чалаан. Күрүне кызыгаарын эртип турда, аарыг кижи илереттинген таварылгада, албаннарның канчаар кады ажылдаарын доктааткан.

Россияның девискээринче кирер “Хандагайты” автомобиль эрттирилге пунктузунда санитарлыг-контроль пунктузунга бубон чумазындан аараан им-демдектерлиг - бажы хенертен аараан, шагзыргай, мага-боду ыстаан, 39 чедир эъди изээн пассажир илереттинген ышкаш кылдыр, өөредилгени эгелээн.

Харыысалгалыг албан черлери халдавырны илередип, чок кылырының чиге чурумнарын шыңгыы сагып, хөделиишкиннерни эгелээн. Бир дугаарында, шупту албаннарның чөпшээрели-биле кызыгаар, каайлы база ветеринарлыг хыналдаларны дораан соксадыр хемчеглерни алган. Чумага каразыткан аарыг кижини аңгылап, кайыын ону чыпшырып ап болурунуң чылдагааннарын тодарадыры-биле айтырып, эпидемияга удур хемчеглерни чорудуп, “Дүрген дуза” бригадазын кыйгырткаш, Өвүрнүң төп кожуун эмнелгезинге аппарып, эмчи дузазын чедирген.

Шупту ведомстволарның төлээлери кирген санитарлыг-эпидемияга удур комиссияның хуралында өөредилгениң кандыг эрткенинге демдекти салган. Дүрген хөделир дизе, чүгле чурт иштинде албаннарның бир деми эвес, а моол коллегаларның кады ажылдажылгазы чугула деп демдеглээн. Ынчангаш дараазында өөредилгени Моолдуң девискээринге эрттирерин саналдаан. Тываның Кадык камгалал яамызының төлээлери чыпшыныычал халдавыр шынап кирип келген таварылгада дүвүрээзинни болдурбас кылдыр, мындыг өөредилгелерни доктаамал эрттирип турары чугула деп демдеглээн.

Тываның чумага удур станциязының чылдың-на чорудуп турар шинчилелдери Өвүр, Мөңгүн-Тайга база Тес-Хем кожууннар девискээрлери чума тыптып болур черлерге хамааржырын бадыткаан. Кожа Моолда кижилерниң бо-ла аарый бээри, серемчилелдиг болурунга чылдагаан дээрзин эпидемиологтар айыткан.
Чыпшынчак халдавырга удур эң дээштиг арга - тарылганы алыры. Бөгүнде Өвүр кожуунда ийи хардан өрү назылыг, шупту 4445 кижи чумага удур тарыткан.