Тываның Баштыңы Владислав Ховалыг ада-иеге ажы-төл дээш харыысалганы улгаттырарын чагаан

Бөгүн чаңчыл езугаар Делегейде уруглар камгалалының хүнүн демдеглеп турар. Бичии чаштарның байырлалында Тываның Баштыңы Владислав Ховалыг мынчаар чугаалаан:

«Бүгү делегейниң уруглар камгалалының хүнү ургларның үрде четтикпейн  манааны чайгы сезонну ажыдар. Чайгы дыштанылгалар эгелээни-биле уругларның хостуг үези көвүдээн. Бо үеде ада-иелер, уругларны азырал-хайгааралга алган азыракчылар харыысалганы чүден артык улгаттырары  чугула.

Республика девискээринде 150 уругларның чайгы дыштанылга лагерьлери  ажылдаарынга белен. Оон аңгыда уругларны сонуургалдарының аайы-биле чүге хаара тудуп болбазыл. Суурларга оюн-тоглаа төптери ажылдаар, аңаа улуг кижилерниң хайгааралы-биле чаштар өөрүшкү-маңнайлыг, боттарынга ажыктыг үени эрттирип болур. Ол чүгле чаштарның сайзыралынга эвес, а чайгы үеде оларның айыыл чок чоруун база хандырар.

Бөгүн эвээш эвес хемчеглерни эрттирерин планнаан. Уругларга шупту чүве солун болгай. Республиканың кожуун, хоорайларынга янзы-бүрү мөөрейлер, оюннар, эстафеталар, театржыткан көргүзүглер болгаш креативтиг мастер-класстар болур».