Президентиниң спортчу оюннарынга Тываны Бажың-Алаак суурнуң школачылары төлээлээр
31.05.2022
Чөөн-Хемчик кожууннуң Бажың-Алаак суурнуң школачылары эрткен неделяда Кызылга эрткен «Президентиниң спортчу оюннарының» регион чадазынга тиилээш, ам школачыларның бүгү-российжи маргылдаазынга төрээн Тывазының адын камгалаар эргени чаалап алган.
Күзүн Анапа хоорайда «Смена» уруглар төвүнге улуг маргылдаага киржири-биле, Бажың-Алаак школазында «Эверест» спортчу клуб командазы белеткелин эгелээн.
Барыын-Хемчиктиң Эрги-Барлык школазының, Кызыл кожуунда Каа-Хемниң 2 дугаар школазының, Таңды кожууннуң Кызыл-Арыг школазының база Кызылдың 5 дугаар гимназиязының спортчулары түңнел оюнга киржир эрге дээш тулушкан.
Албан ойнаар - волейбол, баскетбол, чиик атлетика, стол теннизи база немелде - эштиринге, самбо хүрешке, спортчу туризмге база мини-футболга маргылдаалар болган. Алды кижиден тургустунган командаже 2007-2008 чылдарда төрүттүнген оолдар, кыстар кирген.
Школачы спортчу хөгжүдер адырда муниципалдыг тургузуглар аразында кады ажылдап, салым-чаяанныг оолдар, уругларны илередип, бүгү талазы-биле сайзыраңгай кижини кижизидип, күш-культура болгаш спортка доктаамал барып турар уругларны хаара тудуп, оларның кадыкшылын быжыглаар сорулга-биле «Президентиниң спортчу оюнарын» эрттирип турар. Бо чылын «Президент маргылдаалары-биле» чергелештир Россия Федерациязының Президентизиниң Кубогунга маргылдааны база доктааткан.
Возврат к списку
|