Тыва Республика девискээринде коронавирус талазы-биле эпидемиологтуг байдал

30.05.2022 Росхереглел хайгааралының Тыва Республикада эргелели биле ТР-ниң Кадык камгалал яамызының медээзи-биле алырга, эрткен неделяда, азы 2022 чылдың май 20-26-га чедир COVID-19-тан аарааны лабораторияга бадыткаттынган 27 чаа таварылга бүрүткеттинген. Ол ооң мурнунда неделядан 13 кижи хөй болгаш, 7 муниципалдыг тургузугда демдеглеттинген. 27 аараан кижиниң 33,3 хуузу, азы 9-зу – бичии чаштар, артканы – 18 кижи улуг улус.
Лабораторлуг тестирование-биле Кызыл хоорайда – 9, Ак-Довуракта – 3, Бай-Тайгада – 1, Барыын-Хемчикте - 4, Чөөн-Хемчикте - 1, Кызыл кожуунда - 8, Таңдыда – 1 аарыг кижилер илереттинген.
Амгы үеде 29 аарыг кижи эмнедип турар, оларның 11-и станционарда чыдар. Стационарда 11 кижиниң 5-жи ортумак аар байдалда, 6 кижиниң байдалы ортумак.
2022 чылдың май 29-туң хүнүнден алырга, Тыва Республикада чыл эгезинден тарыышкынның долу курузун 107952 кижи алган, коллективтиг иммунитет - 34%. Баштайгы долу тарыышкын соонда,6 ай эрткенде база катап тарыдар ужурлуг кижиниң саны – 91 245 кижи. Ынчангаш ТР-ниң Кадык камгалал яамызы чурттакчы чонну ковидке удур тарыдып алырынче кыйгырып турар.
Чок болганының чылдагаанын тодарадыр комиссия медээзи-биле алырга, 2022 чылдың январьның 1-ден 48 кижи ковидтен мөчээн.