Тываның кулаа дыңнавас спортчулары Россияның бирги чери дээш дзюдо чемипионадынга чедиишкинниг киришкен

30.05.2022 Майның 28-29 хүннеринде Подмосковьениң Зеленоград хоорайынга кулаа дыңнавас спортчуларның дзюдога Россия чемпионады болуп эрткен. Республиканың кулаа дыңнавас уруглар школа-интернадының чыынды командазы Тываны төлээлээн. Команданың составынче 7-9 класстардан 7 өөреникчи кирген.

Команданың тренер башкызы Чойгана Ооржактың кызымаккай ажылының ачызында, спортчулар 3 алдын, 1 мөңгүн база 2 хүлер медальдарны чаалап алгаш, командалар аразындан ийиги черже үнген.

«Оолдар, кыстарывыстың чедиишкиннеринге чоргаарланып, дыка өөрүп тур бис. Арга-дуржулгалыг тренер Чойгана Хеймер-ооловнаның мында ачы-хавыяазын демдеглезе чогуур. Кыска үе иштинде шыырак команданы белеткеп, республиканың болгаш школазының адын төлептии-биле камгалап шыдааннар. Оолдар, уруглар ынчалдыр амыдыралчы дуржулганы ап, долгандыр хүрээлелге чаңчыгып турарлар. Мөгелеривиске база дагныкчызынга чайынналчак чедиишкиннери-биле байыр чедирип тур бис!” – деп, школазының башкылары болгаш ада-иелери өөрүшкүзүн үлешкеннер.
«Кадыкшылы кызыгаарлыг уруглар спорт школазының» тренер башкызы, дзюдога спорт мастеринге кандидат Чойгана Ооржактың удуртулгазы-биле 2015 чылдан бээр школада дзюдо секциязы ажылдап турар. Тренер башкы - ол-ла школа-интернаттың доозукчузу.