Боттарын ажыл-биле хандыртырган хамаатыларның ийиги шуулганы Кызылга болуп эрткен

30.05.2022 «Бодун ажыл-биле хандыртынары – чедиишкинниг бизнесче бирги базым» деп аттыг боттары ажыл-биле хандырттынган хамаатыларның ийиги республика шуулганы ажылын дооскан.

Тываның шупту булуңнарындан ажыл-биле боттарын ажылга хаара тударынга сонуургалдыг 150 хире кижилер чаңгыс шөлге чыылган. Тыва Республиканың күш-ажыл болгаш социал политика сайыды Эдуард Сандан шуулганның ажылынга киржип, күрүнениң талазындан чонга деткимчениң дээштиг хемчеглерин тодаргайы-биле тайылбырлаан.

Шуулганның киржикчилери күрүне деткимчезин канчаар алырыл, кандыг сайгарлыкчы чорукту эгелээри кедилигил дээн ышкаш айтырыгларга саналдарын солчуп, Тываның чедиишкинниг ажылдыг сайгарлыкчыларының арга-дуржулганы дыңнаан.
Республикада 1565 кижи хууда сайгарлыкчы ажыл-чорудулгазын эгелээри-биле социал керээ негелдези езугаар күрүнеден социал дузаламчыны алган. Республиканың биче сайгарлыкчылары 10 млн ажыг рубльдиң үндүрүүн 2021 чылда күрүне казназынче кииргенин сайыт дыңнаткан.