Тываның эрге-чагыргазынга арга-арыгда улуг өрттерни өжүреринче күштерни база акша-хөреңгини мөөңнээрин дааскан

27.05.2022 Тываның Баштыңы Владислав Ховалыг арга-арыг өрттерин өжүрер ажыл-чорудулганы дүүштүрер федералдыг штабтың хуралынга киришкен. Россия Федерациязының бойдус курлавырлары база экология сайыды Александр Козловтуң даргалааны ВКС хурал май 26-та болган.
Чурттуң Сибирь федералдыг округунуң девискээринде арга-арыг өрттериниң талазы-биле байдал эң нарын деп, хурал үезинде демдеглээн. Иркутск облазында, Красноярск крайда, Тывада база Хакасияда арга-арыг өрттериниң байдалы берге. Ынчангаш ол регионнарның эрге-чагырга органнарынга өрттер өжүреринче күштерни болгаш акша-хөреңгини мөөңнээрин дааскан.

Эрткен хонукта республикада 180 га шөлде үш арга-арыг өрттүн өжүргенин Тываның Баштыңы илеткээн. А май 26-ның эртенги үезинде, арга-арыг фондузунуң черлеринде 644 га шөлде 10 арга-арыг өрттерин өжүрер ажылдарны чоруткан. Оларның ийизи өжүрүттүнген. Оон аңгыда «Азас» күрүнениң бойдус заповеднигинде 15 га черде хыпкан өрттү өжүрүп турар.

Тожунуң арга-арыг ажыл-агыйында база-ла нарын. Ында 202 га черде улуг өрт хып турар. Каа-Хемниң арга-арыг ажыл-агыйында байдал база-ла эки эвес. Ында 300 га черни өрт “таварып” эрткен. Бо ийи таварылгада күштүг хаттар уржукту чедирген. Тываның авиа-арга-арыг хайгааралының десантылары база өрт албанының ажылдакчылары дээш, шупту 54 кижи ында өрттерни өжүрүп турар.

Оон аңгыда Карелияның база Уралдың агаардан база черден арга-арыг камгалаар төптериниң 98 ажылдакчызы, федералдыг авиа-арга-арыг камгалалының Хакасияда бөлүүнден 1 летчик-хайгааракчы база парашют болгаш десант-парашют албанының 37 ажылдакчылары республикада дузазын көргүзүп турарын Владислав Ховалыг дыңнаткан. РФ-тиң Камгалал яамызы республикаже Ми-8 вертолётту өрт өжүржүр кылдыр чоруткан.

Даглыг черлерде өөскээн арга-арыг өрттериниң 90 хире хуузу чаңнык дүшкенинден хыпкан. Ол черлерже техника чедип шыдавас болганындан, өрттү хол-биле өжүрүп турар. Изиг болгаш кургаг агаар өрттерниң өөскүүрүүнге чылдагаан бооп, ажылга шаптыктап турар. Республика чазааның шиитпири-биле Каа-Хем кожууннуң арга-арыгларында онза байдал чурумун киирген.

Оперативтиг штаб ол өрттерни өжүреринче күштерни немээрин Тываның арга-арыг ведомствозунга дааскан. Бир эвес арга-арыгда өрт үнгенин көрүп кагзыңарза, «арга-арыг камгалалының дорт шугумунуң” 8-800-100-94-00 дугаарлыг телефонунче дыңнадырын Россияның Бойдус яамызы сагындырган.
Росгидрометеорологияның медээзи-биле алырга, Сибирьниң, ооң иштинде Тываның девискээринге июньда изиг болгаш кургаг хүннер болурундан, өрт айыылы улуг болуп артар.