Тывада кайы хамаанчок төктүнген боктарны чок кылыр ажылдарның акшаландырыышкынын беш катап улгаттырган

27.05.2022 Тывада кайы хамаанчок төктүнген боктарны аштаарынга 2022 чылда бюджеттен 21 млн рубльди тускайлаан, эрткен чылга деңнээрге ол 5 катап хөй. Коммунал боктарның ала айгаар чыглы берген черлерин аштап-арыглаары элээн калбарар.

Шагаан-Арыг хоорай, Ийи-Тал, Хайыракан, Кур-Чер суурлар девискээрлеринде ашталга ажылдары чыл эгезинден эгелээн. Чөөн-Хемчик, Өвүр, Каа-Хем, Тес-Хем кожууннар база Ак-Довурак хоорай чагыргалары ол ажылдарның дөзевилел-смета документилерин үе шаанда белеткээнинден, немелде акшаландырыышкын шиитпирлетингени-биле “ээ чок” боктарны аштап-арыглаар ажылдар эгелээр.
Кайы хамаанчок төктүнген боктардан суурларны аштаан соонда, тус чер бот-башкарылга органнары бажың болгаш коммунал боктар чыыр черлерни тодарадып, чурттакчылыг черлерге бок чыыр улуг саваларны азы бункерлерни тургузуп, оларны үе-шаанда үндүр төгерин хандырар ужурлуг.

Бо чоокку үш чылда Тываның эрге-чагыргазы Россияның экологтуг оператору-биле кады, Кызылдан ырак эвеске база регионнуң барыын кезээнде Чадаана хоорайның чоогунга бок чыыр ийи заводту тудуп, ажылдадыр планныг.