Тываның Баштыңы Владислав Ховалыг Россияның сайгарлыкчы чорук хүнү-биле республиканың бизнес ниитилежилгелеринге байырны чедирген

26.05.2022 «Россияның сайгарлыкчы чорук хүнү-биле байыр чедирип тур мен!
Сайгарлыкчыларының саны немежип турар мурнакчы беш регионнуң санынче Тыва база кирген. Хуу сайгарлыкчылар болгаш боттарын ажыл-биле хандыртынган хамаатылар-биле кады санаарга, биче болгаш ортумак сайгарлыкчы чорук адырында ажылдап турарларның саны көвүдээн. Бо чылдың эгезинде оларның саны 18 муң кижи четкени өөрүнчүг.
Тываның сайгарлыкчыларынга саң-хөө болгаш ажыл-агыйжы планнарында хөй-хөй чедиишкиннерни сеткилим ханызындан күзеп тур мен. Ажыл-херээңер бүдүнгүр болуп, улуг чедиишкиннер силерни манап, үе-шак силерге ажылдаар болзун» – деп, В. Ховалыг социал четкилерде бодунуң арынынга бижээн.