«ЗаБег» бүгү-российжи чартык марафонга Тываның спорт школаларының кижизидикчилери идепкейлиг киришкен

23.05.2022 Кызылга үш дугаар эрткен «ЗаБег» бүгү-российжи чартык марафон республиканың найысыладындан болгаш кожууннарындан чүгүрүктерни чыгган. Старттан үнген 978 спортчунуң финишке келген 775 кижизиниң 262-зи бичии уруглар болган. Спортчулар 21,1 км, 10 база 5 километр хемчээлге күжүн шенээннер.

Спорттуң бо хевиринге профессионалдарга база сонуургалдыгларга организастаан чартык марафоннуң кол сорулгазы - шак мындыг массалыг спортчу хевир-биле Төрэн чуртка ынакшылды оттуруп, киржикчилерниң тиилелгеже чүткүлүн мөөңнеп, спортту болгаш амыдыралдың кадык овур-хевирин нептередири болган.

Чарыштың организаторы – Тываның Спорт яамызы бо чылын маргылдаага республиканың спорт школаларындан эң хөй кижи киришкенин демдеглээн. «Чаа-Хөл», «Авырга», «Бии-Хем», «Чеди-Хөл», «Улуг-Хем», «Барыын-Хемчик», «Өвүр» спорт школаларының кижизидикчилери чартык марафонну маңнажып эрткен. Оон аңгыда Кызылдың Президентиниң кадет училищезиниң кадеттери, «Tuva Running», «Выжившие люди» чарыш клубтарының кежигүннери, Кызылдың 5 дугаар школазының, Б.И. Араптан аттыг Сукпак школазының, Балгазын школазының өөреникчилери, Тываның күрүне университединиң, олимпийжи курлавыр училищезиниң студентилери, «Кызыл хоорайның спорту» МАА биле найысылал мэриязының ажылдакчылары чарышка киришкен.

Чарыштың эң бичии киржикчилери ада-иелери-биле кады 1 километрниң оруун маңнашкан.
Чарыштың киржикчилери үш хонук эрте бээрге, ЗаБег.РФ https://russiarunning.com/Results сайтыдан бодунуң түңнелдерин көрүп болур.