Тыва биле Якутия чурттакчы чоннуң кадык камгалал адырында кады ажылдажылга керээзинге атты салган

20.05.2022 Регионнуң Баштыңы Владислав Ховалыгның даалга езугаар республиканың кадык камгалал яамызы Якутиядан специалистерни чалаан.
Саха Республикадан (Якутия) бөлүк эмчилерниң арга-дуржулга солчуп келген үезинде, Тываның чурттакчы чонунуң кадык камгалал адырында кады ажылдажылга дугайында керээге регионнуң кадык камгалал сайыды Анатолий Югай биле Якутияда республиканың офтальмология эмнелгезиниң кол эмчизи Иван Луцкан аттарны салып, дугуржулганы кылган.
Якутиядан келген аалчылар республиканың 1 дугаар эмнелгезиниң офтальмология салбырынга чедип, 14 аарыг кижиниң караанга кезиишкиннерни кылып, арга-дуржулгазын солушкан.
Якутияның карак эмнелгезиниң улуг эмчизи Иванс Луцкандан аңгыда, Саха Республиканың (Якутия) Кадык камгалал яамызының штаттан дашкаар кол офтальмологу Екатерина Захарова, стационар эмнелгениң офтальмолог эмчизи Марина Максимова, консультативтиг-диагностика салбырының офтальмолог эмчизи Пантелеймон Аргунов, кезер эмчи сестра Айталина Хобусарова олар аарыг кижилерни шинчип, карак эмчилери-биле ужурашкан.