Тываның Баштыңы Россия Чазааның вице-премьери Татьяна Голикова-биле республика хөгжүлдезиниң перспективаларын чугаалашкан

20.05.2022 Владислав Ховалыг ужуражылга дугайында социал четкилерде бодунуң блогунга дыңнаткан. “Россияның Чазааның вице-премьери Татьяна Голикова-биле ажыл-агыйжы ужуражылгада бистиң республиканың чедип алганы түңнелдеривисти үлештим” – деп, Тываның Баштыңы демдеглээн.
Тываның Баштыңы республиканың географтыг база агаар-бойдузунуң онзагайындан үнген чидиг айтырыгларны, ооң бирээзи - школалар база уруглар садтарының тудуун көвүдедири эргежок чугула дээрзин, республикаже транспорттуң чедингириниң айтырыын база чугаалашканын дыңнадып бижээн.
"Чуртче санкциялыг ыйыдыышкыннар экономиканы Чөөн чүкче угландырарын болдурган. Тываны таварар демир-орук тудуун тудар айтырыг катап көдүрүлген. Алызы барып Россиядан Моолду таварты Кыдатче угланыр орук республиканың экономиктиг бурунгаарлаашкынынга тергиин идиг апаар. Татьяна Алексеевна-биле ажыл-агыйжы чугаа үезинде, социал айтырыгларывысты шиитпирлээринге, бистиң транспорт база логистика төлевилелдеривисти деткиир аргаларын өөренип көөрү чугула деп, база катап үндезилеп тайылбырладым. Чугаавыстың түңнелдери-биле мээң тургускан айтырыгларымны шиитпирлээр дугайында даалгаларны федералдыг ведомстволарга бээр болду. Республиканың хөгжүлдезинге ол дузалыг болурунга бүзүрээр мен” – деп, Владислав Ховалыг бижээн.