Тывада культура болгаш уран чүүл адырында төлевилелдерге республика Баштыңының грант акшазының үстүкү хемчээлин көвүдеткен

19.05.2022 2022 чылда Тываның Баштыңының уран чүүл болгаш культура адырында грантызының үстүкү түңү 500 муң рубль болур. Республиканың Чазаа ол дугайында чогуур шиитпирни хүлээп алган. Тываның Баштыңы Владислав Ховалыгның даалгазы-биле ону белеткээнин, ТР-ниң Культура яамызы дыңнаткан.

Чогаадыкчы төлевилелдерге грантының түңү ооң мурнунда 300 муң рубльдан ашпайн турган. Шаңнал акшазын улгаттырганы культура болгаш уран чүүл адырында ниитилел ужур-дузалыг инициативаларның санынга болгаш шынарынга, ооң дээштиинге эки салдарны берип, сайгарлыкчыларның аңаа киржиринге идигни бээр дээрзинге яамы бүзүреп турар.

Дүрүм-биле алырга, республика Баштыңының грантызын чогаал, чурулга, хөгжүм, хореография, театр база цирк уран чүүлүнде, кино болгаш анимация, музей, библиотека болгаш архив херээ, улусчу чогаадылга, уран-тывыш база дарганнаашкын адырында, ол ышкаш культура болгаш уран чүүл адырында өөредилге болгаш эртем-шинчилелдерде культура байлаан камгалап-кадагалап, тургузуп, тарадып-нептередип, шиңгээдиринче угланган чогаадыкчы төлевилелдерни боттандырарынга тыпсыр.