«Чаа делгемнер» марафонну 70 ажыг млн кижи көрген

19.05.2022 «Чаа делгемнер» федералдыг чырыдыышкын марафону российжилерниң сонуургалын хаара туткан. Ийи хонук иштинде марафоннуң дамчыдылгазын 70 млн кижи көрген.

Марафон – Россияның «Билиг» ниитилелиниң тускайлаң ажыл-дуржулгалыг болгаш улуг хемчээлдиг ажылы болур. Марафонда беш дискуссия шөлдери ажылдап турар, спикерлер - Президентиниң парлалга секретары Дмитрий Песков, РФ-тиң Чазааның даргазының оралакчылары Юрий Борисов, Дмитрий Чернышенко, Татьяна Голикова, РФ-тиң даштыкы херектер сайыды Сергей Лавров, Россия Банкызының даргазының бирги оралакчылары Ольга Скоробогатова болгаш өскелер-даа сөстү алганнар.

Тывадан оолдар, уруглар – Кызылдың 3, 12 дугаар школаларының, Чаа-Хөл суурнуң ортумак школазының база Тыва Республиканың Күрүне лицейиниң 9-10 классчылары Дмитрий Песков-биле ужуражылгага киришкенин сагындыраал. Олар улуг класстарның бүгү-российжи Чырыдыышкын оюннарының финалында база киржип турарлар. Кижиниң бүгү талалыг сайзыралынче угланган интеллектуалдыг-спортчу эртемнерге хөй мергежилдиг маргылдаа болур. Ол оюннар «Чаа делгемнер» марафоннуң программазында онзагай болуушкун болган.
Марафоннуң эрткен ийи хүнүнде, төрээн чуртка ынакшыл, эки турачы чорук, чурттуң саң-хөө хамаарышпас чоруу, транспорт адырының база камгалал-үлетпүр комплекизиниң чедиишкиннери, онлайн-садыглаашкынны хөгжүдери, импортту солууру, делегей экономиказының кыйгылары болгаш трендилериниң дугайында айтырыгларны сайгарып чугаалашкан.
«Чаа делгемнер» федералдыг марафон —  шылгараңгай күрүне болгаш хөй-ниити ажылдакчылары, бизнестиң, эртемниң, культураның, спорттуң лидерлери киришкен 200 ажыг лекторлар болгаш дагдыныкчыларның 220 ажыг шак дургузунда  чырыдыышкынныг ажылы-дыр. Марафоннуң программазын marathon.znanierussia.ru сайтызындан көрүп болур. Россияның «Билиг» ниитилелиниң сайтызындан, партнерларның Контактыда болгаш өске-даа курлавырларда арыннарындан марафон шөлдеринден онлайн-дамчыдылганы күзелдиг кижи бүрүзү көрүп болур.
Россияның «Билиг» ниитилелиниң парлалга албанының телеграм-каналында марафоннуң медээлерин хайгаараңар.