Тывада чаагайжыдар хөй-ниити девискээрлерин шилиир рейтингилиг бадылаашкынның чамдык түңнелдерин үндүрген

17.05.2022 Тывада 2023 чылда чаагайжыдар хөй-ниити девискээрлерин шилээн бадылаашкын апрель 15-те эгелээн. Республика ол сорулгаже шупту 69 төлевилелди саналдаан. Федералдыг программаже кирип, Россияның бюджединден саң-хөө деткимчезин алыр дизе, 14 хардан өрү назылыг республиканың 36 муң хире чурттакчызы za. gorodsreda.ru сайтыга олар дээш үнүн берип, бадылаар ужурлуг.

Тываның Чазааның аппарат хуралында бадылаашкынның чамдык түңнелдерин үндүрген. Амдыызында чаңгыс-даа төлевилел хөй-ниити девискээрлерин чаагайжыдар күрүне программазынче кииреринге  чоннуң херек деткимчезин албаан бооп турар. Май 15-ке чедир республиканың кииргени чаагайжыдылга төлевилелдери дээш дөрттүң биринден эвээш кезии, азы чүгле 8,5 муң кижи бадылаан.

Үш кожуун - Барыын-Хемчик (72,5 хуу), Бии-Хем (54,6) база Өвүр (52,6) хөй үннерни берип, чогуур негелдени күүседиптер аргалыг. Ак-Довурак хоорай, Тес-Хем база Сүт-Хөл кожууннар чурттакчы чоннуң 40-ден хөй кезиин хаара туткан. Артканнары чаагайжыдылга программазынче кирери чөгенчиг. Ылаңгыя республика найысылалы, Кызыл база Таңды кожууннар рейтингиниң эң сөөлүнде.

Республиканың Баштыңы Владислав Ховалыг хөй-ниити шөлдерин чаагайжыдар объектилер шилилдезинге чурттакчыларның идепкейлиг киржилгезин чедип алырын хандырырын чазактан, кожуун болгаш суму чагырга черлеринден негээн. Улуг назылыг кижилерге гаджет таварыштыр онлайн бадылаашкынга киржирин дузалажыр волонтерлар санын көвүдедир даалганы сайыттарга берген. Улуг класс өөреникчилери база студентилер бадылаашкынга идепкейин көргүзер ужурлуг.

Таарымчалыг хүрээлелди хевирлээр национал төлевилел боттарының бажыңнарының чанын биле дыштаныр черлерин чаагайжыдарынга чоннуң дорт киржилгезинден аңгыда, республиканың экономиказынче инвестицияларны хаара тударының эптиг дөзү болуп турар. Тыва чүгле 2022 чылда федералдыг бюджеттен 86 млн ажыг рубльди ол шугум-биле алган. Ол акша-хөреңги-биле 26 хөй-ниити шөлдерин чаагайжыткан.