Тывада Сайгарлыкчы чорук неделязы-2022 ажылын эгелээн

16.05.2022 Бөгүн, май 16-да, “Алдын-Булак” этнокультурлуг комлексте эртип турар “Тыва – дириг ужур-чаңчылдарның чери” турисчи шуулганның ажылының үезинде Сайгарлыкчы чорук неделязынга стартты берген.

Тываның бизнесменнеринге сайгарлыкчы чорукту сайзырадып-хөгжүдер чаа арга-шиитпирлерниң база угланыышкыннарның дугайында тайылбырны бээр. Бо удаада аңаа киржир күзелдиглерниң саны дыка хөй болганын, ТР-ниң Экономиктиг хөгжүлде яамызы дыңнаткан.

Туризм индустриязында ажылдап чоруур билдингир спикерлер Тывага туризм индустриязын дүрген хөгжүдеринге чүлер идиглиг бооп болурун республиканың сайгарлыкчыларынга база чурттакчыларга сонуургадыр.

Шуулган үезинде Туризм индустриязының ниити-национал эвилели, Тыва Республиканың Туризм талазы-биле информация төвү база төлевилелдериң эгелекчилери моон-даа соңгаар кады ажылдаарының дугуржулгазын чарган.
Майның 20-22 хүннеринде, “Субедей” спорткомплекизинге, «Тыва экспо-2022» делгелге-садыглаашкынның хемчеглери болуп эртер.