Эрткен неделяда 632 литр арага болгаш спирт холумактыг продукцияны хавырган

16.05.2022 Регионнуң айыыл чок чорук департаментизи хөй-ниитиниң айыыл чок чоруун хандырар дээш профилактика субъектилериниң ажылын күштелдирген. Эрткен неделяда иштики херектер органнарының база Кызыл хоорай мэриязының болгаш муниципалдыг тургузуглар чагыргаларының ажылдакчылары арага болгаш спирт холумактыг продукцияны хоойлуга чөрүштүр садып-саарылгазынга удур 283 үнүүшкүннерни кылган. 

Рейд үезинде арага продукциязын чөпшээрел чок садып турган 8 фактыны илереткен. 632 литр арага болгаш спирт холумактыг продукцияны садып-саарылгадан уштуп, хавырган. Тожу кожууннуң Тоора-Хем суурга эң хөй – 547 литр спирт холумактыг продукцияны хавырган. Полиция ажылдакчылары илереттинген болуушкуннарга буруулуг кижилерге административтиг харыысалганы онааган.

Чыл эгезинден тура улусчу дружиналарже 1031 эки-турачыларны хаара туткан. 220 объектилерни эргип, хынаан. Учетта 17 назы четпээннер база ооң мурнунда шииттирип чораан административтиг хайгааралда 48 кижи бар берге байдалдыг 62 өг-бүледе байдал кандыызын хынап четкен.

Социал төлевирлер, пенсия пособие үнген үелерде, хайгааралда өг-бүлелерже, түреңги байдалда өг-бүлелерниң ажы-төлүнче, сагылга-чурумунуң талазы-биле учетта хамаатыларже профилактиктиг үнүүшкүннерни онза күштелдирерин кожуун, суму болгаш хоорай чагыргаларынга дааскан.