Тывада “Чылдың өг-бүлези” конкурстуң регион чадазының түңнелдерин үндүрген

13.05.2022 “Чылдың өг-бүлези” бүгү-российжи конкурстуң регион чадазын республикада 2017 чылдан бээр эрттирип турар. Бо чылын мөөрейге 39 өг-бүле киришкен. Бүгү-россия деңнелинге киириштирери-биле республика чадазының тиилекчилериниң дугайында медээни федералдыг оргкомитетче чоруткан. Тиилээн өг-бүлелерни Тываның үлегерлиг өг-бүлелериниң Хүндүлел самбыразынче киирген, май 15-те – Бүгү-делегейде өг-бүле хүнүнде, Кызылда Өг-бүле сесерлиинге оларны шаңнап-мактаар.
Конкурс беш аңгы углааныышкынга эрткен: «Хөй ажы-төлдүг өг-бүле», «Аныяк өг-бүле», «Көдээ ишчи өг-бүле», «Алдын өг-бүле» база «Өг-бүле – ужур-чаңчылдарның кадагалакчызы».

«Хөй ажы-төлдүг өг-бүле» деп угланыышкынга бирги черни Кызыл хоорайдан Аяс Александрович биле Чойган Игоревна Сааялар, ийиги черни Кызыл кожуундан Амыр-Санаа Хулер-оолович биле Алдынай Орус-ооловна Ак-оолдар, үшкү черни Тере-Хөл кожуундан Байыр-оол Дондукович биле Синара Виталиевна Иргиттер алган.

«Аныяк өг-бүле» деп аттарга: Кызыл кожуундан Ахмет Салимжанович биле Ариадна Спартаковна Мерзабаевтер; Тожу кожуундан Сайдаш Вячеславович биле Буяна Эресовна Самбуулар; Улуг-Хем кожуундан Сергек Владимирович Чукпанай биле Нелля Александровна Ооржак төлептиг болганнар.

Мөңгүн-Тайга кожуундан Анай-Хаак Борзек-ооловна Достай биле Орлан Ильич Донгактың; Бай-Тайга кожуундан Шолбан-оол Иргитович биле Виктория Сонгулдаевна Сотпаларның; Өвүр кожуундан Май-оол Дандар-оолович база Тайгана Романовна Донгактарның өг-бүлези “Көдээ ишчи өг-бүле” деп тускай шаңналдарны алган.

«Алдын өг-бүле» шаңналга дараазында өг-бүлелер шылгараан: бирги черде –Александр Ооржак-оолович биле Татьяна Маңнай-ооловна Кууларлар (Чөөн-Хемчик кожуун); ийиги черде - Анатолий Конгар-оолович Монгуш биле Галина Монгушовна Тас (Өвүр кожуун); үшкү черде – Виктор Салчакович Чамбый биле Булунмаа Иргитовна Чогээ (Бай-Тайга кожуун).

Дараазында үш өг-бүле «Өг-бүле – ужур-чаңчылдарның кадагалакчызы» мөөрейге тиилээн: Кежик Анчы-оолович биле Айя Леонидовна Буяндылар (Таңды кожуун); Аяс Валерьевич Сарыкай биле Чейнеш Урановна Лопсан (Чөөн-Хемчик кожуун); Валерий Даваевич биле Екатерина Киим-ооловна Севектер (Тожу кожуун).

Тес-Хем кожуундан Кур-Дагба Хорлай-оолович биле Салбакай Тихоновна Ланааларның өг-бүлези эрткен чылын бүгү-российжи конкурстуң «Өг-бүле – ужур-чаңчылдарның кадагалакчызы» деп мөөрейинге киришкеш, тиилелгелиг чанып келгенин сагындыраал.
Россия Федерациязының Күш-ажыл болгаш социал камгалал яамызы база Амыдыралдың берге байдалынга таварышкан уруглар деткиир фонд 2015 чылдан бээр “Чылдың өг-бүлези” бүгү-российжи конкурсту организастап эрттирип турар. Бүгү-российжи конкурска тиилээн өг-бүлелер дугайында Хүндүлелдиң ному база Бүгү-российжи конкурс киржикчилериниң дугайында ном кирген Өг-бүлелерниң төөгүзүн чырыткан национал номну чыл санында-ла конкурстуң түңнелдеринге даянгаш, парлап үндүрүп турар.