Тывада “Улусчу көвүрүг” төлевилелче 13 кожуун кордап турар

12.05.2022 Тываның 13 муниципалдыг тургузуглары 764 малчын турлагларже аргыжылганы экижидер дээш, 28 көвүрүг тудары-биле “Улусчу көвүрүг” губернатор төлевилелинге киржир чагыгны киирген.

Республиканың орук-транспорт яамызы амгы үеде оларның документилерин хынап турар. Шилилде эрткен кожуун чагыргалары-биле республиканың орук фондузундан субсидияны үндүрүп бээр дугайында дугуржулганы чарар.
Төлевилел негелдези езугаар ыяш көвүрүг кежиглер тудуун көдээ чагырга чери баштап, хөй-ниитиниң киржилгези-биле тудар.

Тожу, Тес-Хем, Бай-Тайга база Улуг-Хем кожууннар боттарының девискээринге беш чедир көвүрүглерни деткиишкинниң күжү-биле тудуп алыр күзелин дыңнаткан. Мөңгүн-Тайга, Таңды, Чеди-Хөл база Өвүр кожууннар чедери берге черлерде малчын турлагларже транспорттуң чедингирин экижидер күзелин илеретпээн.

Чагыгларның негелделерге дүгжүп турарын хынаары июнь 1-де доостур. Орук-транспорт яамызы-биле муниципалдыг тургузугларның аразынга керээ чардынган соонда, 45 хонук иштинде материалдарны садып, тудугну эгелээр ужурлуг. Чаа ыяш көвүрүг кежиглерни ноябрь төнчүзүнде ажыглалче киирер.

Час келирге-ле оруктарын база көвүрүглерин суг чууй шааптар черлерде малчын аалдарның чагыы езугаар, Тываның Баштыңы Владислав Ховалыг чайлагларже машина-балгаттың чедерин экижидер дээш ындыг төлевилелди саналдап үндүргенин сагындыраал.