Тывага российжи болгаш даштыкы эксперттерниң киржилгези-биле амгы үеде туризмни хөгжүдериниң айтырыгларын сайгарып чугаалажыр

12.05.2022 «Дириг езу-чаңчылдарның чери» деп бренд-биле туризм шуулганын эрттиреринге Тыва белеткенип турар. Туризм болгаш аян-чорук индустриязында ажылдап чоруур российжи болгаш даштыкы специалистер май 16-да улуг шуулганга чыглыр. 

Россияда туризмни чөөн чүкче угландыр хөгжүдеринге чаа аргаларны, ооң иштинде Азияже чаа орукту ажыдарынга Тываның географтыг туружун база культурлуг онзагайларын чугаалажыры – чугааның кол утказы.

Киржикчилерниң аразында Россияның регионнарындан, Белорусьтан база Моолдан төлээлерниң киржип келири - шуулганга сонуургал улуг дээрзин бадыткап турар. Ростуризмниң, Москваның, Тываның, Красноярск крайның, Хакасияның чазааның туризм-биле харылзаалыг ажылдакчылары, адырны бүрүнү-биле эде тургузар сорулгалыг тургустунган Хүндүлээчел чорук индустриязының национал эвилелиниң удуртукчулары, турисчи агентилелдер төлээлери база операторлар, туризм адырында билдингир федералдыг төлевилелдерниң авторлары болгаш кураторлары ужуражылгаларны башкарар.

Чыылганнар туризм адырында хөгжүлдениң амгы үеде байдалындан аңгыда, туризм дугайында хоойлужудулгаже киирер өскерлиишкиннерниң, саң-хөө болгаш өске-даа деткимче хемчеглериниң дугайында чугаалажыр.

Тываның Баштыңы Владислав Ховалыг, Хүндүлээчел чорук индустриязының ниити национал эвилелиниң президентизи Алексей Волков, РФ-тиң Күрүне Думазының Туризм болгаш турисчи инфраструктура хөгжүлдезиниң талазы-биле комитетте Эксперт чөвүлелиниң даргазы Христофор Константиниди, Хакасияның баштыңының оралакчызы Сергей Комаров, Енисей Сибирин хөгжүдер корпорацияның чиңгине директору Сергей Ладыженко, Беларусь Республиканың Туризм талазы-биле национал агентилелдиң директорунуң оралакчызы Елена Лихимович, Моолдуң Убсанур аймааның Бойдус болгаш туризм эргелелиниң начальниги Энхтуяа Батбуян болгаш өскелер-даа шуулганның ажылчы кезээнде сөстү алырлар.
Шуулган үезинде Хүндүлээчел чорук индустриязының национал эвилели биле Тываның Туризм талазы-биле информация төвүнүң аразында кады ажылдажылга керээзинге атты салыр.




1