Тыва эмнелге албан черлерин чаа реабилитация дериг-херекселдери-биле четчелээринче 38,9 млн рубльди хаара туткан

05.05.2022 2022 чылда Тываның эмнелгелеринде реабилитация салбырларын быжыглаар дээш, ниитизи-биле 38,9 млн рубль акшага амгы үениң дериг-херекселдерин садар.
Россияның Чазааның даргазы Михаил Мишустин акша-хөреңгини үндүрер дугайында чазактың айтыышкынынга атты май 4-те салган.
«Аарыг кижилерге шынарлыг эмчи дузазын көргүзеринге амгы үениң дериг-херекселдери дыка дузалыг. Амбулаторияда азы хүндүс чыдып эмнедип турар кижилер албан медицина камгаладылгазының хуудузу-биле халас реабилитацияны эртип ап болур» – дээн, премьер-министрниң сөстерин федералдыг чазактың албан езузунуң сайтызында айыткан.
“Кадыкшылды катап тургузарынга эң-не эптиг арга - эмчи реабилитациязында” деп федералдыг программадан акша-хөреңгини тускайлап үндүрер. Ковидтеп, берттинип-кемдеп, хан-дамыр эргилдезиниң аарыгларындан аараан соонда, катап кадыкшылын тургузарынга тускай хемчеглер болгаш аргалар херек реабилитация эмнелге системазын чаартыры – төлевилелдиң сорулгазы ол.