Тес - Хемде өг - бүле байырлалы
20.08.2013
Тыва Республиканың ХБАБ эргелелиниң Тес-Хем кожуунда албанынга Тес-Хем кожууннуң үндезилеттингенинден бээр 90 чыл, Самагалдайның 240 чыл оюнга тураскааткан өгленишкен аныяктарның байырлыг бадылажыышкынының езулалы эрткен.
Сүт дээрге чуртталганың баштайгы чеми, аныяктарның амыдырал-чуртталгазының делгем оруу сүт дег арыг, чаагай болзун дээш авалары аяктарда ак сүттүг, ак кадактыг оглу, кеннин уткуп хүлээп алган.
Төөгүлүг чылда өг-бүле туткан аныяктар Али Май-оолович Кончук биле Олеся Эдуардовна Мөгедирниң өг-бүлениң бүрүткээшкин езулалын Тес-Хем кожуунда ХБАБ албанының удуртукчузу Лилия Георгиевна Чооду эрттиргеш, өг-бүлениң кол документизи өгленишкен дугайында херечилелди тывыскан. Тыва Республиканың ХБАБ эргелелиниң даргазының хүлээлгезин күүседип турар О.В.Тугур-оол аныяк, чалыы өг-бүлеге байыр чедирип, Тыва Республиканың Баштыңы Ш.В.Кара-оолдуң байырлыг бижиин дамчыткан.
Байырлалга Самагалдайның улуг назылыг хоочуну 91 харлыг Шимит Балчыр Балчитович аныяк өг-бүлеге амыдыралга узун, ак орукту күзээн. Самгалдай суурнуң хоочуннары Чеден Балдарович биле Алдын-кыс Кара-ооловна Даңгыттар аныяк өг-бүлеге чагыг-сөзүн берип, белекти сөңнээн.
Аныяк өг-бүле Самагалдай суурнуң субурганынга чаагай чолдуң кадактарын баглаан.
Орууңар ак болзун! Курай! Курай!Курай!
Лилия Чооду, кожуунда ХБАБ албанының удуртукчузу.
Возврат к списку
|