Тывада «Эзирлер уязы» төлевилел күүселдези-биле база бир спортчу залды туткан

04.05.2022 Тывада «Эзирлер уязы» төлевилел күүселдези-биле туттунган база бир спортчу залды май байырлалдарының бүдүүзүнде ажыглалче киирген. Хостуг хүрешке делегей чемпионадынга тиилеп, делегей кубогун чаалап алган бирги тыва мөге Александр Хертектиң төрээн сууру Барлыкта 206 дөрбелчин метр шөлдүг чаа зал ажыттынганы ол.

Ону тударынга ниитизи-биле 2,15 млн рубль үнген, ооң 1,8 млн рублин республика чазаа үндүрген болза, 350 муң рубльди муниципалитет боду акшаландырган. Тудугну школага немей туткан болгаш, чүгле өөреникчилерге эвес, а суурнуң чурттакчыларынга кирер черни аңгылаан.

Тываның Спорт яамызының ажыл-агый эргелели тудугну удурткан болза, Барлык суурнуң чону тудуг ажылдарынга идепкейлиг киржип, дузазын каткан. Объектини 8 ай туткан. “Эзирлер уязын” байырлыы-биле ажыдар хемчегче Тываның бирги президентизи Шериг-оол Ооржакты чалаан.

Республиканың ам-даа дөрт суурунга “Эзирлер уязы” төлевилел-биле чаа спорт залдары туттунар.