Тываның техникумнары база колледжтеринге 24 бүдүрүлге мастерскаяларын ажыдар
14.04.2022
«Аныяк профессионалдар» төлевилел мөррейинге Тыва тиилээш, ортумак тускай өөредилге черлериниң материал-техиниктиг баазазын чаартырынга федералдыг бюджеттен 56 млн рубльди алыр.
Ол акша-хөреңги-биле 2022 чылда республиканың техникумнар база колледжтеринге амгы үениң 11 мастерскаяларын ажыдып, күш-ажыл рыногунда хереглелдиг, станоктар болгаш өске-даа дериг-херекселдерге ажылдап билир специалистерни белеткеп үндүрерин Тываның Өөредилге болгаш эртем яамызы дыңнаткан.
Тываның Тудуг техникумунга 6 угланыышкынга - «Суг технологиялары», «Тууйбу салыры», «Сантехника болгаш одалга», «BIM информастыг модель технологиялары», «Дуңзаа технологиялары», «Электромонтаж» талазы-биле мастерскаяларга өөредилге-бүдүрүлге дериг-херекселдерин садып салыры планнаттынган. Кызылдың транспорт техникумунуң баазазынга «Автогрейдер башкарары» база «Аар техника хандырылгазы» өөредилге чорудуунга ийи мастерскаяны ажыдар. Тываның политехниктиг техникуму «Мода технологиялары», «Повар херээ» база «Сайгарлыкчы чорук» мергежилдерге 3 лабораторияны дериир.
Өөредилге-бүдүрүлге дериг-херекселдериниң чамдыызын республикада эккелген. «BIM информастыг модель технологиялары» мастерскаязында эптээшкин ажылдары эгелээн. Транспорт техникуму бо неделяда келген ийи автогрейдеринде өөредилгени эгелээн. Сентябрьның 1-ден шупту 11 мастерская ажылдаар.
«Өөредилге» национал төлевилели-биле 2024 чылга чедир Тываның сес колледж база техникумнарынга тос аңгы угланыышкынныг 24 мастерскаяны ажылдадыр.
Возврат к списку
|