Тывада “Улусчу көвүрүг” губернатор төлевилелиниң бирги киржикчилерин шилип эгелээн

14.04.2022

Тываның Орук-транспорт яамызы “Улусчу көвүрүг” губернатор төлевилелинге киржир чагыгларны муниципалдыг тургузуглардан хүлээп алырын чарлаан. Республика Баштыңы Владислав Ховалыг чайлагларже орук-чирик айтырыын көдүрген малчыннарның чагыы-биле төлевилелди саналдап киирген. Чазын хар эрип, суглар көдүрүлгеш, малчын аалдарже үнер кокпа оруктарны база ыяш көвүрүглерни бо-ла чууй алгаш баар. Малчыннар боттары ол ажылга күш четпес.

Ынчангаш Тываның Баштыңы Орук-транспорт комплекизиниң планынче малчын коданнарже оруктарны болгаш көвүрүглерни септеп кылыр хемчегни киирерин, регионнуң Орук фондузундан ону акшаландырарын саналдаан. Ол санал “Улусчу көвүрүг” деп аттыг губернатор төлевилели кылдыр боттанып эгелээр. Ооң киржикчилерин суурларга мөөрей чарлааш, шилиир деп шиитпирлээн.

Төлевилелге киржир дизе, суур чагыргазы көвүрүг азы орук тударының азы септээриниң чылдагаанын айтыр. Оон аңгыда тус чер бот-башкарылга органнары боттарындан инвестицияның чамдыызын салып, тудуг бригадазын чыып, ыяш болгаш өске-даа материалдар-биле хандырар. Мөөрей дугуржулгазының негелдези езугаар, көвүрүгнү 30 хонук дургузунда тудуп доозар.

Мөөрейге киржир чагыгларны апрель 25-ке чедир хүлээп алырын ТР-ниң Орук-транспорт яамызы дыңнаткан. Мөөрейниң негелделериниң дугайында тодаргайы-биле дараазында телефоннардан билип алыр: 8 (394-22) 9-76-76, 9-76-77, база яамызының сайтызы - https://mindortrans.rtyva.ru/.