Тывада чылдың тулган башкыларын илереткен

12.04.2022 Тывада башкыларның билиг-мергежилиниң эң кол мөөрейи – “Тыва Республиканың чылдың башкызы” конкурстуң түңнелдерин үндүрген. 185 башкы Россияга профессионал мергежил мөөрейинге киржир эрге дээш билиг-мергежилин шылгашкан. Мөөрейниң регион чадаларында эрттирген башкыларның боттарының чогаадыкчы кичээлдеринге, мастер-класстарынга жюри демдектерни салган. Эң төнчү кезээнде арткан беш башкы республиканың өөредилге сайыды Алексей Храмцовтуң боду-биле ажык чугааны кылган соонда, мөөрейниң түңнелдери билдинген. “Тыва Республиканың чылдың башкызы – 2022” конкурстуң регион чадазының тулган тиилекчизи – Чеди-Хөл кожууннуң Хову-Аксы школазының эге класстар башкызы Наталья Ооржак болган. А “Тыва Республиканың чылдың кижизидикчи башкызы – 2022” мөөрейге база-ла Хову-Аксы суурда «Дюймовочка» уруглар садының кижизидикчи башкызы Туяна Сат шылгарап, тиилээн. Тиилекчилерге 100 муң рубль акшга шаңналын тывыскан. Ам олар конкурстуң бүгү-российжи чадазынга Тыва Республиканың адын камгалап, киржирлер. Конкурстуң «Тыва Республиканың чылдың башкызы – аныяк специалист - 2022» деп атка Кызылдың 4 дугаар школазының орус дыл болгаш литература башкызы Донакай Анастасия, «Төрээн дыл, ол ышкаш орус дыл башкыларының бүгү-российжи мастер-клазы – 2022» деп мөөрейге Тываның кадет корпузунуң төрээн (тыва) дыл болгаш чогаал башкызы Даржай Алдынай, «Тыва Республиканың чылдың директору - 2022» атка Тоора-Хем школазының директору Дажы-Лама Любовь, «Тыва Республиканың тулган эр башкызы – лидер болгаш дагдыныкчы - 2022» деп атка Кызыл-Мажалык суурнуң 2 дугаар школазының биология башкызы Сюрюн Мерген, «Тыва Республиканың психолог башкызы - 2022» атка Кызылдың 8 дугаар школазының психолог башкызы Наваждай Айдаша, «Кижини кижизидери - 2022» деп номинацияга Тываның кадет корпузунуң англи дыл башкызы, класс удуртукчузу Донгак Регина, «Тыва Республиканың чылдың мастери - 2022» атка Тываның тудуг техникумунуң Шагаан-Арыг хоорайда салбырының бүдүрүлге өөредилгезиниң мастери Седен Руслана олар төлептиг бооп, шаңналдарны алган. Мөөрейниң тиилекчилеринге, шылгараңгай киржикчилеринге Дус-Хөл хөлде “Башкы” пансионатка дыштаныр путевкаларны, акша шаңналдарын тывыскан.