Чеди-Хөл кожуунда 82 өг-бүле чаа бажыңнарже көшкен

12.04.2022 “Чуртталга оран-савазы база хоорай хүрээлели” национал төлевилелдиң аварийлиг чуртталга фондузундан өскээр көжүрер республиканың адрестиг программазы-биле, Чеди-Хөл кожууннуң Хову-Аксы суурнуң Гагарин кудумчузунда, 1А дугаарлыг бажыңда чаа квартираларның дүлгүүрлерин чурттакчыларынга дамчыткан. Байырымныг хемчегге Тываның Чазааның даргазының бирги оралакчызы А. Брокерт, республиканың тудуг сайыды А. Хунай-оол, Чеди-Хөл кожууннуң Баштыңы - Төлээлекчилер хуралының даргазы А. Ооржак, Чеди-Хөл кожууннуң чагырга даргазы А.Араптан аас-кежиктиг өг-бүлелерге байырны чедирген. Аварийлиг чуртталга фондузундан өскээр көжүрер республиканың адрестиг программа күүселдези-биле Хову-Аксында Юбилейная, Гагарин база Мир кудумчуларда беш бажыңны туткан. Суурнуң 209 чурттакчызының чуртталга байдалын экижидер. Бо удаада эргижирээн алды бажыңнарга чурттап турган 82 өг-бүле дүлгүүрлерни алыр аас-кежиктиг болган. Чаа квартираның ээзи Оскал-оол Оюн чуртталгазында өөрүшкүлүг болуушкунну мынчаар чугаалаан: - Эрги бажыңым орнунга чаа квартираны алганымга канчаар-даа аажок өөрүп тур мен. Чаа бажыңнарывыс чараш, чылыг, чырык-тыр. Тываның баштыңы Владислав Товарищтайовичиге, Тываның Чазаанга четтиргенимни илереттим. Бажыңнарын камнап, ону чаагайжыдарынче шупту кожаларымны кыйгырып тур мен!” Күрүне керээзи-биле үш каът бажыңнарны хууда сайгарлыкчы Самдан А.Д., «Угулза» КХН,«Атриум» КХН, «Виксар» КХН тутканнар.