Виктория Абрамченко Тываның баштыңы албан-дужаалга бир чыл болганы-биле Владислав Ховалыгга байырны чедирген

11.04.2022 Россияның вице-премьери Виктория Абрамченко Тываның баштыңы Владислав Ховалыгның ажылынга моон-даа соңгаар чедиишкиннерни күзээн. Виктория Абрамченко республика Баштыңының албан-дужаалче киргенден бээр бир чыл болганы-биле байыр чедирген телеграммазында чедиишкиннерни чедип алырда кол рольду ойнаан шиитпирлиг болгаш ажыл-ишчи шынарларын онзалап демдеглээн. Россияның Чазааның даргазының көдээ ажыл-агый айтырыгларын удуртуп турар оралакчызы Виктория Абрамченко кызыгаар регион Тывага агроүлетпүр комплекизин дүрген хөгжүдери чугула дээрзин онзалап айыткан. Амгы экономиктиг байдалдар үезинде ол айтырыг чугула черни ээлеп турар. «Амгы инвестиция төлевилелдерин деткип, көдээ ажыл-агый ажыглалынче чаа черлерни киирип, боттуң бүдүрүлгезиниң темпизин улгаттырар херек. Чүгле төлевилелдер боттаныышкынының стратегиязын хүлээр эвес, үре-түңнелдерни база көргүзер. Регионга херек шупту деткимчени көргүзер мен. Чаңгыс чылдың ажылы – оруктуң чүгле эгези, хөй эвес үе-дир. Тываның, Сибирьниң база Россияның хөгжүлдези дээш ам-даа үре-түңнелдиг ажылдаарыңарны күзедим!» - деп, телеграммада бижээн.