Кызылга хостуг хүрешке Россия чемпионады болуп эртер

11.04.2022 Тываның баштыңы Владислав Ховалыг Россия Федерациязының Хостуг хүреш федерациязының удуртулгазы-биле ужурашкан. Республика баштыңының саналдааны-биле Кызылга болур Россия чемпионадының айтырыгларын дугуржур дээш аалчылар Тываның найысылалында чедип келген. РФ-тиң Спортчу хүреш федерациязының президентизиниң чөвүлекчизи, коммерция директору Юрий Федоров, федерацияның хостуг хүреш килдизиниң начальниги Петр Юмшанов база федерацияның саң-хөө талазы-биле директору Роман Гайдунов олар республикада келгеннер. Владислав Ховалыг мооң мурнунда Россияның Спортчу хүреш федерациязының президентизи Михаил Мамиашвилиже инициативаны киирерге, ол деткээн. Кызылга хостуг хүрешке Россия чемпионадын эрттирер дээн идеяны РФ-тиң камгалал сайыды Сергей Шойгу база деткээн. 2022 чылдың июньнуң 16-19 хүннеринде Кызыл хоорайга XXX чемпионады планнаттынган. Маргылдааларның белеткел ажылдары чоруп турар, бөгүнгү ужуражылгада өске-даа организастыг айтырыгларны чугаалашкан. Россияның Спортчу хүреш федерациязы-биле маргылдааның болур черин – Кызылдың президент кадет училищезиниң чиик атлетика манежин баш бурунгаар дугурушкан. Маргылдааны эрттирер улуг программаны белеткеп турар. Республиканың Спорт яамызы-биле чазак даргазының маргылдааны харыылаар оралакчызы маргылдаага келир 500 хире киржикчини канчаар чыттырарының айтырыын чугаалашкан. Россияның аңгы-аңгы субъектилеринден 300 мөге , 200 төлээ база чалаттырган аалчылар келир. «Мындыг хемчээлдиг маргылдааны Тывага эрттирери – чүгле улуг болуушкун база алдар эвес, а ботту көргүзеринге эптиг арга. Делегей ареналарынга чайынналчак чедиишкиннерни чедип алган алдар-аттыг спортчулары-биле республика билдингир. Чүге дизе хүреш тыва кижиниң эң ынак спортчу оюну. Шаг төөгүден бээр тывалар хрежип чораан. Ол бистиң ханывыста» - деп, республика баштыңы демдеглээн. Владислав Ховалыг российжи деңнелде спортчу регион кылдыр Тываны бурунгаарладырынга ооң ужур-дузазын билгеш, республикага улуг маргылдааларны эрттирер кылдыр эрткен чылдан бээр чалап эгелээн. Кызылга бо чылдың февральда эрткен Россия чемпионады биле Бирги чер дээш сумо маргылдаазынга чурттуң 20 регионундан 250 спортчу киришкен. Тывага ооң мурнунда бүгү-российжи деңнелдиг маргылдаа - спортчу хүреш Тывага 1997 чылда болуп эрткенин сагындыраал. Тываның баштыңы ужуражылганың төнчүзүнде, чурттуң кол турнирин маңаа эртирери улуг хүндүткел-дир деп демдеглээш, РФ-тиң Спортчу хүреш федерациязынга четтиргенин илереткен. Тываны төлептиг көргүзер дээш маргылдаа эртер спортчу болгаш социал объектилерни чогуур байдалче киирер даалганы республиканың Спорт яамызынга берген. Тывада хостуг хүреш – спорттуң эң нептереңгей хевири. Спортчу хүрешке Россияның чыынды командазынче беш мөге бо хүнде кордакчы. Бүгү республикада 4180 кижи хостуг хүреште хаара тутунган болза, оларны 135 тренер өөредип, белеткеп турар.